مين ليها غيرنا كلنا
لازم نصونها بدمنا
مين ليها غيرنا
وقت لما كلنا
نقول خلاص خلصت وتاهت مننا
========
مين اللي قال
إنها تاهت
دي جايه في الأفق
بلدي شايفها من بعيد
وردة تفتح في الصباح
لكنها وردة حبيسة في السجون
ناقص لها إطلاق سراح
==========
مين اللي حبسك يا بلد
ولدك و آه من العقوق
وكل يوم وقت الشروق
أجي وأناجي ربنا
إنه يرجع الحقوق
===========
لكن يا غالية مش هخيب
لو سابوا همّ مش هسيب
عمري ماهعمل زيهم
ولا عمري هابقى منهم
ولا لحظة أبقى زيهم
===========
همّ اللي باعوا
وأنا اللي شاري يا بلد
أنا الولد نعم الولد
والتاني مش ابنك بجد
مش كل واحد
يبقى ضنى ولا أي حد
يقول كلام يبقى صحيح
مش كل واحد قال بحبك
لازم صريح
لكني والله صريح
===========
حبك دا ساري في جتتي
ولا عمره مرة في يوم يموت
حبك دا هو جنتي
دا هو روحي ومهجتي
بلدي أمانة في ذمتي
أحفظها لو حتى هاموت
